Neysluútgjöld á heimili nema 443.000 á mánuði

Neysluútgjöld á heimili árin 2009–2011 voru 443 þúsund krónur á mánuði og hafa aukist um 0,4% frá tímabilinu 2008–2010.

Vísitala neysluverðs hækkaði um 4,0% frá 2010 til 2011 og hafa heimilisútgjöldin dregist saman um 3,5% að teknu tilliti til verðbreytinga. Á heimili búa að meðaltali 2,4 einstaklingar.

Þetta kemur fram í Hagtíðindum Hagstofunnar þar sem fjallað er um niðurstöður úr rannsókn á útgjöldum heimilanna árin 2009–2011. Niðurstöður eru sundurliðaðar eftir búsetu, heimilisgerð, tekju- og útgjaldahópum. Heildarniðurstöður eru bornar saman við útgjaldarannsóknina 2008–2010.

Ráðstöfunartekjur meðalheimilisins í rannsókninni voru 514 þúsund krónur á mánuði. Ráðstöfunartekjur flestra hópa voru hærri en útgjöld þeirra en neysluútgjöldin voru að meðaltali 86% af ráðstöfunartekjum.

Í úrtaki voru 3.471 heimili, 1.799 þeirra tók þátt í rannsókninni og var svörun 51,8%.