Tundurdufl sprengt við Stapafell

Landhelgisgæslan sprengdi tundurdufl við Stapafell fyrir stuttu. Mikill hvellur heyrðist frá sprengingunni. Svo mikill var hann að íbúi í Reykjanesbæ taldi að jarðskjálfti hefði riðið yfir.

Það var togveiðiskipið Sóley Sigurjóns GK sem fékk tundurduflið í veiðarfæri sín djúpt út af Sandgerði fyrr í dag.

Samkvæmt upplýsingum frá Landhelgisgæslunni stafaði mikil hætta af duflinu og var skipverjum komið frá borði hið snarasta.

Talið er að um 300 kíló af sprengiefni hafi verið í sprengjunni.

Sprengjan var síðan flutt að Stapafelli þar sem hún var sprengd um sex leytið.

Íbúar í Reykjanesbæ voru varaðir við af lögreglu. Nokkrum brá þó í brún þegar hús þeirra tóku að nötra. Þá hafði íbúi samband við fréttastofu og tilkynnti um snarpan jarðskjálfta í Reykjanesbæ.