Linda segir ástandið skelfilegt og mikla geðshræringu ríkja

„Við Ísabella erum bara tvær a ferðalagi en nokkuð hundruð manns a þessu resorti. Var sagt að fara eins hátt upp og við kæmumst en svo ekkert meir. Hér er bara beðið. Litlan mín sex ára er hrædd og vill komast heim. Segjum tvær." Þetta segir Linda Pétursdóttir sem er ein á ferðalagi með Ísabellu 6 ára dóttur sína í Tælandi þar sem fólk er á flótta upp í hæstu hæðir af ótta við flóðbylgju sem spáð er að geti orðið allt að sex metra há.

Linda segir ástandið skelfilegt og allir séu mjög hræddir að reyna að koma sér eins hátt upp og mögulegt er. Veðrið er slæmt í þessum ógnvekjandi aðstæðum, þrumur og eldingar og fólk í geðshræringu vegna yfirvofandi náttúruhamfara. Linda reyndi að senda myndband af aðstæðum „Sendi video af brjáluðum þrumum og eldingum, en er mjog skjalhent sokum hrædslu," segir hún en myndbandið barst ekki þannig að það væri hægt að spila það.

Linda segir að rafmagnið sé farið og símasamband sé mjög lélegt eða ekkert. Hún er samferða breskum hjónum og segir hún hughreystandi að vita til þess að maðurinn sé með 20 ára reynslu úr hernum sem hefur reynslu af að vinna úr þeim skelfilegu aðstæðum sem þau takast nú á við. Fjörutíu manns hafa sent Lindu og Ísabellu stuðningskveðju á Facebook m.a. annars móðir Lindu, Ása Dagný Hólmgeirsdóttir: „Guð gefi að allt fari á besta veg. Sendum ykkur hlýjar hugsanir og bænir."