Morgunblaðið: Bakkavararbræður virðast nýta sér fjárfestingaleið SÍ

Félag í eigu Bakkavararbræðra, Korkur Invest ehf., virðist nýta sér fjárfestingaleið Seðlabanka Íslands til þess að kaupa fjórðungshlut í móðurfélagi Bakkavarar, en íslenskir lífeyrissjóðir töpuðu tugum milljarða á fjárfestingu í félaginu. Þetta kemur fram í viðskiptablaði Morgunblaðsins í dag.

Í frétt blaðsins kemur fram að stjórn Korks Invest, sem er í eigu Ágúst og Lýðs Guðmundssona, hafi samþykkt heimild til þess að gefa út breytanlegt skuldabréf upp að allt að fjóra milljarða til tíu ára, sem er sá árafjöldi sem þarf að vera til þess að mögulegt sé að fara í gegnum fjárfestingaleið Seðlabanka Íslands, en með því gefst þátttakendum kostur á afslætti á gjaldeyriskaupum. Leiðin er hluti af áætlun um afnám gjaldeyrishafta, en Þorgeir Eyjólfsson, fyrrverandi framkvæmdastjóri Lífeyrissjóðs verzlunarmanna, stýrir þeirri vinnu innan Seðlabanka Íslands.

Samþykkt var á aðalfundi móðurfélags Bakkavarar í síðustu viku að Bakkavararbræður gætu eignast fjórðung í félaginu, en kröfuhafar, þar Arion banki stærstur, samþykktu fyrirkomulag þess efnis en þeir eiga 75 prósent hlut í félaginu á móti Bakkavararbræðrum.