Milljarðaframkvæmdir fyrirhugaðar á Grundartanga

Norðurál á Grundartanga áformar verkefni fyrir á annan tug milljarða. Markmiðið er að auka framleiðni, bæta rekstraröryggi, og auka framleiðslu um allt að 50 þúsund tonn af áli á ári, að því er fram kemur á vef fyrirtækisins.

Þar segir að allt frá því Norðurál lauk við byggingu seinni kerlínunnar á Grundartanga hefur framleiðslan aukist hægt og bítandi. Þannig hefur framleiðslan aukist frá 260 þúsund tonnum, sem er skráð framleiðslugeta álversins á Grundartanga, í 284 þúsund tonn á ársgrundvelli.

Fyrirhugaðar framkvæmdir, sem auka framleiðslugetu um 30 til 50 þúsund tonn á ári að því gefnu að tilskilin leyfi fáist, hafi að markmiði að auka samkeppnishæfni til lengri tíma. Stærstu verkþættir séu stækkun aðveitustöðvar og umfangsmikil endurnýjun í skautsmiðju auk notkun stærri rafskauta.

„Heildar fjárfestingin hér á landi verður yfir 10 milljarða íslenskra króna, auk fjárfestingar móðurfélags Norðuráls í rafskautaverksmiðju, þannig að þetta er risavaxið verkefni sem tekur 5 ár að ljúka," segir Ragnar Guðmundsson, forstjóri Norðuráls, í frétt á vef fyrirtækisins.