ESÍ átti 340 milljarða um áramót

Eignasafn Seðlabanka Íslands (ESÍ) var stofnað eftir hrun til að halda utan um allskyns útistandandi kröfur Seðlabankans. Að stærstum hluta er um að ræða þær kröfur sem ríkissjóður keypti af bankanum til að gera eigið fé hans jákvætt í lok árs 2008 og sem bankinn keypti síðan aftur á árinu 2009.

Í ársskýrslu Seðlabankans segir að ESÍ hafi á árinu 2011 náð samkomulagi við „mikinn hluta þeirra slitastjórna sem fara með stjórn þeirra fyrirtækja sem ESÍ á kröfur á. Í kjölfarið hefur ESÍ fullnustað veð auk þess að eiga almenna kröfu á fyrirtækin. Á árinu 2011 tók ESÍ yfir Hildu hf. sem varð þá dótturfélag ESÍ".

Í lok árs 2011 átti ESÍ eignir sem sagðar voru 340,3 milljarða króna virði. Þær eignir eru 21 prósent af heildarefnahag Seðlabankans. Eignir ESÍ lækkuðu um 56 milljarða króna í fyrra. Að sögn Seðlabankans má rekja þá lækkun til innheimtu eigna og niðurgreiðslu á skuldum gagnvart eiganda sínum. Samtals nam hagnaður ESÍ þremur milljörðum króna í fyrra.

Á meðal þeirra eigna sem geymdar eru inni í ESÍ er seljendalán sem Seðlabankinn veitti við söluna á hinum danska FIH-banka haustið 2010. Höfuðstóll lánsins var upphaflega 70 milljarðar króna en Seðlabankinn hefur viðurkennt að líkur séu á því að hluti þess muni tapast. Bankinn vill hins vegar ekki upplýsa um hvert bókfært virði lánsins er í bókum ESÍ.