Íslendingar hringja tvær milljónir farsímtala dag hvern

Íslenskir farsímanotendur hringdu alls tæplega 766 milljón símtöl í fyrra, að því er fram kemur á vef Póst- og fjarskiptastofnunar. Það er um þriggja prósenta aukning frá árinu 2010 og jafngildir rúmlega tveimur milljónum símtala á degi hverjum að jafnaði.

Flest símtölin voru í farsíma innanlands, eða 640 milljónir, 107 milljónir voru í talsíma innanlands og 19 milljónir símtala voru til útlanda.

Síminn var með tæplega 300 milljónir af fyrrgreindum símtölum, Nova með 221 milljón símtala og Vodafone með 213. Önnur fyrirtæki voru með minna.