Leigusamningum fækkaði um 22% milli ára í september

Þinglýstum leigusamningum á landinu fækkaði um tæp 22% í september s.l. miðað við sama mánuð í fyrra.

Þetta kemur fram á vefsíðu Þjóðskrár Íslands. Þar segir að samningarnir hafi verið tæplega 1.150 talsins í september s.l. á móti tæplega 1.470 samningum í sama mánuði í fyrra.

Á höfuðborgarsvæðinu þar sem flestir samningar eru gerðir fækkaði þeim um 21%. Samningum fjölgaði hvergi á milli ára en fjöldi þeirra stóð í stað á Austurlandi.

Mesta fækkunin varð á Norðurlandi eða 37% og á Vestfjörðum eða tæplega 42% en þar eru aðeins fimm samningar að baki þeirri fækkun.