Ábyrgur vegna skuldar - ekki kynnt greiðslumat

Héraðsdómur Reykjavíkur komst í dag að þeirri niðurstöðu að fasteignarveðsetning ábyrgðarmanns vegna skuldar fyrrverandi tengdarsonar síns væri ekki ógild þrátt fyrir að ábyrgðarmanninum hefði ekki verið kynnt greiðslumat á skuldara.

Óumdeilt er að greiðslumat fór fram og reyndist jákvætt, þ.e. skuldarinn var talinn geta staðið undir sínum skuldbindingum. Hins vegar var ábyrgðarmanninum ekki kynnt niðurstaða greiðslumatsins og hann skrifaði undir skuldabréf tengdarsonar síns sem ábyrgðarmaður án þess að hafa kynnt sér matið.

Þrátt fyrir þennan skort á upplýsingum komst dósmtóllinn að þeirri niðurstöðu að ábyrgðarmanninum bæri að standa við sína skuldbindingu, þ.e. veðið í fasteigninni væri gilt.

Árið 2001 gerðu fjármálafyrirtæki með sér samkomulag til verndar ábyrgðarmönnum skulda. Samkomulagið hafði ekki lagagildi, en þar skuldbundu fyrirtækin sig til að láta fara fram greiðslumat á skuldurum og kynna væntanlegum ábyrgðarmönnum niðurstöðu matsins. Sérstaka staðfestingu ábyrgðarmanns þurfti til ef matið reyndist neikvætt. Almennt bar þó bankanum að gefa ábyrgðarmönnum kost á að kynna sér það jafnvel þó það væri jákvætt.

„Niðurstöðuna í dag má túlka þannig að það voru töluvert miklar skyldur lagðar á ábyrgðarmanninn til að kynna sér greiðslumatið og hafa uppi athugasemdir nánast strax," segir Árni Helgason, lögmaður ábyrgðarmannsins og vill meina að samkomulag fjármálafyrirtækjanna nái ekki því markmiði sínu að vernda ábyrgðarmenn ef þeir þurfa sjálfir að afla sér allra fyrirliggjandi upplýsinga um skuldarann og kynna sér reglur um ábyrgðarmenn.

„Við eigum eftir að taka ákvörðun um hvort málinu verður áfrýjað til Hæstaréttar," sagði Árni.