Ljósmyndasýning úr Veiðivötnum

Veiðivötn frá hinum ýmsu sjónarhornum er viðfangsefni ljósmyndasýningar sem opnuð verður í Heklusetrinu á Leirubakka á morgun kl. 16:00. Veiðimenn sem leggja Suðurland undir fót næstu daga ættu að koma við og upplifa þetta rómaða veiðisvæði í gegnum linsur þeirra Sigrúnar Kristjánsdóttur og Pálma Bjarnasonar sem hafa tekið myndirnar á undanförnum árum og sýna nú afraksturinn.

Á sýningunni úr Veiðivötnum eru tekin fyrir margvísleg viðfangsefni, svo sem náttúran og vötnin í bæði blíðu og stríðu, og svo eru myndir frá veiðum á stöng og í net auk mynda úr klakferðum í Veiðivötnum, segir í frétt á fréttavefnum DFS.is.