Fjórðungs aukning á framboði Icelandair

Icelandair ætlar sér að auka framboð sitt yfir hinn hefðbundna vetrartíma, sem er frá nóvember til mars, um tuttugu til 25 prósent. Þessi aukning endurspeglar stöðu bókana hjá félaginu. Nýir áfangastaðir sem flogið verður á í vetur eru Denver, München, London Gatwick, Bergen, Stavanger og Þrándheimur. Birkir Hólm Guðnason, framkvæmdastjóri Icelandair, segir þessa miklu aukningu vera lið í þeirri stefnu Icelandair að minnka árstíðasveiflur í flugáætlun félagsins og eins í komu ferðamanna. „Sérstök áherslu verður lögð á ferðamannamarkaðinn til Íslands, í takt við verkefnið Ísland allt árið, sem er markaðssamstarf hins opinbera og ferðaþjónustunnar, og gera má ráð fyrir verulegri fjölgun ferðamanna núna yfir háveturinn frá síðasta vetri í samræmi við aukið framboð.“

Icelandair Group, móðurfélag Icelandair, hagnaðist um 1,7 milljarða króna á öðrum ársfjórðungi, sem var fjórum sinnum meira en á sama tíma í fyrra. - þsj