Algert vanmat á endurgreiðslum vegna kvikmyndagerðar

Framkvæmdastjóri kvikmyndaframleiðslufyrirtækisins Pegasus segir að ríkisstjórnin geri ráð fyrir allt of lágum fjárhæðum til endurgreiðslu vegna kvikmyndagerðar á Íslandi í fjárlagafrumvarpinu fyrir 2013.

Í frumvarpinu er gert ráð fyrir 400 milljóna króna fjárheimild fyrir endurgreiðslur vegna kvimyndagerðar. Til samanburðar fara endurgreiðslurnar yfir 900 milljónir króna á þessu ári samkvæmt nýjustu tölum.

Endurgreiðslur vegna kvikmyndagerðar á Íslandi eru mikilli óvissu háðar. Þær ráðast af verkefnum framleiðenda sem eru lítt fyrirsjáanleg og t.d. geta stór erlend verkefni komið til sögunnar eftir að fjárlög eru samþykkt. Snorri Þórisson, framkvæmdastjóri Pegasus, segir samt að það sé engin spurning að 400 milljónir verði of lítið árið 2013.

Samkvæmt lögum endurgreiðir íslenska ríkið 20% af framleiðslukostnaði kvikmynda sem gerðar eru á Íslandi. Endurgreiðslurnar ná aðeins til skattskyldrar eyðslu hérlendis, þar fellur t.d. launakostnaður íslenskra starfsmanna undir sem og hótelleiga og fleira í þeim dúr.

„Þetta er bara grín," segir Snorri um áætlanir stjórnvalda. Nokkrar stórmyndir voru framleiddar hér á árinu 2012. Endurgreiðslur vegna einhverra þeirra munu ekki koma til fyrr en árið 2013. Auk þess eru fleiri verkefni í pípunum.

Snorri getur ekki áætlað hversu háar endurgreiðslurnar verði árið 2013 þegar upp verður staðið. „Menn geta aldrei sagt til um það," segir hann en telur þó að íslensk stjórnvöld hefðu frekar átt að gera ráð fyrir of miklu. „Þá hefði fjármagnið bara getað farið eitthvert annað ef áætlunin hefði ekki náðst," segir hann en telur að stjórnvöld lendi í vanda ef áætlunin er of lág. Þá þurfi að taka á vandanum með fjáraukalögum eða fresta kostnaðinum fram á næsta ár.