Bjarnfreður segir ákæru í Exista-málinu vonbrigði

Lýður Guðmundsson og Bjarnfreður Ólafsson eru í ákæru sérstaks saksóknara sagðir hafa brotið gegn hlutafélagalögum tveimur mánuðum eftir hrun fjármálakerfisins, með því að standa ólöglega að hlutfjáraukningu Exista. Bjarnfreður segir ákæruna mikil vonbrigði.

Í ákærunni er Lýði Guðmundssyni, sem var stjórnarformaður Exista, gefið að sök stórfellt brot gegn hlutafélagalögum með því að standa fyrir greiðslu upp á einn milljarð króna fyrir nýtt fimmtíu milljarða króna hlutafé í félaginu í desember árið 2008.

Milljarðurinn kom í raun frá Lýsingu hf., dótturfélagi Exista, í formi láns en samkvæmt ákæru rann upphæðin aldrei inn í rekstur Exista. Upphæðin var þess í stað vistuð á vörslureikningi Logos lögmannstofu.

Meint brot Bjarnfreðar, samkvæmt ákæru, snýr að því að vísvitandi hafi verið ranglega tilkynnt um hækkun á hlutafé Exista, í tilkynningu til hlutafélagaskrár. Fyrirtækjaskrá ríkisskattstjóra úrskurðaði hlutafjáraukninguna ólöglega hinn 29. júní 2009 og kjölfarið kærði fyrirtækjaskrá og Arion banki hlutafjáraukninguna til embættis sérstaks saksóknara. Nú, rúmum þremur árum síðar, hefur rannsókn embættisins leitt til ákæru.

Í ákæru segir orðrétt, að "brotið sé stórfellt í ljósi þess að um var að ræða 50 milljarða króna hlutafé og greiðslan nam einungis 2 prósent af nafnvirði þess."

Bjarnfreður Ólafsson vildi ekki veita viðtal, þegar fréttastofa náði af honum tali í dag, en hann sagði ákæruna vera mikil vonbrigði og að hún hafi komið honum verulega á óvart.

Gestur Jónsson, hæstaréttalögmaður og lögmaður Lýðs, vildi ekkert láta hafa eftir sér um málið í dag, þegar fréttastofa náði af honum tali.

Ákæran verður þingfest 11. október næstkomandi í Héraðsdómi Reykjavíkur.