Viðskiptaráð: Árangurinn þyrfti að vera meiri

Það er óumdeilt að árangur hefur náðst í ríkisfjármálum frá árinu 2008, segir í nýjum pistli sem birtist á vef Viðskiptaráðs í dag. Sá árangur er hins vegar ekki í samræmi við upphaflegar áætlanir sem endurspeglast meðal annars í fyrirhuguðum skattahækkunum næsta árs, þvert á fullyrðingar um að til þeirra þyrfti ekki að koma.

Viðskiptaráð segir að bætt staða hagkerfisins frá hruni skýrist einkum af þremur þáttum. „Í fyrsta lagi setningu neyðarlaga sem kom í veg fyrir að óhóflegar byrðar féllu á ríkið. Í öðru lagi sérlega hagfelldra aðstæðna fyrir útflutningsgreinar sem viðheldur fjárfestingu, störfum og þar með skattgreiðslum. Í þriðja lagi aðhalds í ríkisfjármálum, í samræmi við áætlun AGS, þó deila megi um áhrif einstakra ákvarðana sem teknar hafa verið á þeim grunni," segir í pistlinum.

Vara við kosningaloforðum

Viðskiptaráð segir að þó fjárlög næsta árs sýni betri stöðu nú en fyrir fjórum árum sé staða ríkissjóðs enn þung og ríkt tilefni til áframhaldandi aðhalds. Nýlegar fregnir af stöðu Íbúðalánasjóðs endurspegla vel hversu viðkvæmt ástandið er. Allt útlit er fyrir að ríkissjóður þurfi að leggja minnst fjórtán milljarða inn í sjóðinn til viðbótar við 33 milljarða árið 2010.

Viðskiptaráð segir að full þörf sé á að stjórnmálaflokkarnir hafi þessa stöðu ríkissjóðs í huga við mótun útgjaldaloforða vorsins, en kosningvor er í vændum. Það sé sérstaklega mikilvægt í ljósi þess að árangur síðustu ára hefur að einhverju leyti skapað jákvæðari umræðu um stöðu ríkissjóðs en uppgjör síðasta árs og framtíðarverkefni gefi tilefni til.