Norðmenn grunaðir um ólöglegar veiðar við Ísland

Áhöfn TFGNÁ, þyrlu Landhelgisgæslunnar stóð norskt línuveiðiskip að meintum ólöglegum veiðum í reglugerðarhólfi í Skeiðarárdýpi um klukkan ellefu í morgun.

Varðstjórar stjórnstöðvar Landhelgisgæslunnar höfðu komið auga á skipið um klukkan hálfníu í morgun í ferilvöktunarkerfum, þar sem það var statt inni í hinu lokaða hólfi og virtist vera að leggja línu. TFGNÁ sem var við að fara í eftirlitsflug var því beint á svæðið og hafði áhöfn hennar samband við skipið og fékk uppgefnar staðsetningar sem samræmdust athugunum varðstjóranna.

Skipverjum skipsins hefur verið gert að ljúka við að draga línuna og halda síðan til Vestmannaeyja þar sem skýrslutaka mun fara fram.