Verðmæti útflutnings hefur aukist mikið

Útflutningsvörur Íslendinga hafa aukist að verðmæti á fyrri helmingi ársins miðað við sama tíma í fyrra.

Fluttar voru út vörur fyrir 291,6 milljarða á fyrri helmingi ársins 2011, en fyrir 313 milljarða í ár. Munar þar mestu um aukið verðmæti sjávarafurða sem jókst um 21,1 prósent á milli ára, úr 105,5 milljörðum í 132,3 milljarða. Þetta kemur fram í gögnum Hagstofu Íslands.

Innflutningur Íslendinga hefur einnig aukist og gerir það að verkum að vöruskiptajöfnuður er ekki eins jákvæður á fyrri helmingi ársins 2012 og í fyrra. Fluttar voru inn vörur fyrir 245 milljarða króna á því tímabili 2011, en 281,7 milljarða í ár.

Vöruskiptajöfnuður fyrstu sex mánuði ársins nam 31,246 milljörðum króna í ár, en í fyrra 46,724 milljörðum.

Verðmæti landbúnaðarafurða hefur aukist mest útflutningsvara, eða um 34,4 prósent. Íslendingar fluttu út landbúnaðarvörur fyrir 5,2 milljarða á fyrri helmingi ársins 2012. Verðmæti iðnaðarvara hefur dregist saman um 4,4 prósent, en þær eru þó verðmætasti einstaki vöruflokkurinn í útflutningi og skiluðu 167,2 milljörðum króna í þjóðarbúið.- kóp