Skattahækkun væri rothögg fyrir ferðaþjónustuna

Til stendur að hækka virðisaukaskatt á gistinætur úr 7% í 25,5% prósent í nýju fjárlagafrumvarpi. Samtök ferðaþjónustunnar segja hækkunina reiðarslag en framkvæmdastjóri hjá Icelandair talar um hneyksli.

Stjórnvöld hafa í hyggju að endurskoða skatta á ferðaþjónustuna, í tengslum við vinnu fyrir fjárlög næsta árs. Eins og greint hefur verið frá í fréttum Stöðvar 2 er gatið sem stjórnvöld eiga eftir að loka upp á 16 til 20 milljarða króna, sem brúað verður með skattahækkunum og niðurskurði.

Eitt af því sem rætt hefur verið um er að hækka virðisaukaskatt á gistingu úr 7 prósent í 25,5 prósent, það er úr lægsta þrepi í það hæsta.

Magnea Þórey Hjálmarsdóttir, framkvæmdastjóri Icelandair Hotels, telur hækkunina á skattinum nú vera út í hött.

„Rothögg. Eitt orð yfir það. Allir afskaplega ánægðir með sumarið. Allir afskaplega ánægðir með að það var útlit fyrir góða vertíð. Og að koma með þetta núna í byrjun ágúst þegar við sem vinnum í þessum geira erum að sjálfsögðu löngu búin að semja um öll verð fyrir 2013. Við erum að vinna í 2014 núna. Svo að þessu leyti er þetta bara alveg óskiljanleg aðgerð," segir Magnea.

Endanlegar ákvarðanir varðandi það hvaða skattar verða hækkaðir og hvaða útgjöld verða skorin niður, liggja ekki endanlega fyrir, samkvæmt heimildum fréttastofu. Magnea segir ferðaþjónustuna vera sérstaklega næma fyrir stöðugu umhverfi.

„Það vita það allir að við erum alltaf að vinna tvö ár fram í tímann. Viðskiptavinurinn sættir sig ekkert við þetta. Þannig að vera að tala um þetta á 'high-season' er algerlega út í hött og ekki til neins annars en að rífa niður," segir hún.