Tap lífeyrissjóðanna nærri meðaltali

Tap íslensku lífeyrissjóðanna er nálægt meðaltali þess sem varð hjá lífeyrissjóðum OECD-ríkja, segir í yfirlýsingu sem Landssamtök lífeyrissjóða birtu á vefsíðu sinni í dag. Það hafi því ekki einungis verið íslensku lífeyrissjóðirnir sem urðu fyrir áfalli í kreppunni.

Í yfirlýsingunni harma Landssamtök lífeyrissjóða þá skerðingu á lífeyrisgreiðslum og réttindum sem sjóðsfélagar margra lífeyrissjóða hafi mátt þola. Að sama skapi beri að fagna að nú liggi fyrir umfangsmikil skýrsla úttektarnefndar á fjárfestingarstefnu, ákvarðanatöku og lagalegu umhverfi lífeyrissjóðanna í aðdraganda bankahrunsins 2008.

Í skýrslunni er heildartap lífeyrissjóðanna frá janúar 2008 til ársloka 2010 tilgreint tæpir 480 milljarðar króna. Landssamtök lífeyrissjóða benda á að þessi fjárhæð sé um 95 milljörðum krónum hærri en sjóðirnir hafi rakið til efnahagshrunsins frá október 2008. Mismunurinn helgist af ólíkum viðmiðunartímabilum. Sé tímasetning tjónsins miðuð við fall bankanna verði heildartap sjóðanna eftir sem áður mikið eða um 380 milljarðar.