Lífeyrissjóðirnir töpuðu 74 milljörðum vegna fyrirtækja Björgólfsfeðga

Íslenskir lífeyrissjóðir töpuðu alls 74 milljörðum króna vegna félaga í eigu Björgólfsfeðga, að því er fram kemur í skýrslu rannsóknarnefndar lífeyrissjóðanna.

Skýrsla rannsóknarnefndar Landssamtaka lífeyrissjóða var kynnt á föstudag. Á kynningu í upphaf fundarins var dregið saman tap lífeyrissjóðanna á einstökum félagasamstæðum.

Það sem var hins vegar ekki dregið saman sérstaklega á glærukynningunni á föstudag er tap vegna fjárfestinga sem tengjast Björgólfsfeðgum og tengdum félögum, en samkvæmt töflu í fyrsta bindi skýrslunnar kemur fram að íslenskir lífeyrissjóðir hafi samtals tapað um 8,6 milljörðum króna vegna fjárfestinga í skuldabréfum Landsbankans og 21,7 milljörðum króna á hlutabréfum bankans, samtals um 30 milljörðum króna. Lífeyrissjóðirnir töpuðu 18,7 milljörðum króna á skuldabréfum Straums og 6,8 milljörðum á hlutabréfum bankans. Þá töpuðu lífeyrissjóðirnir 9,3 milljörðum króna á skuldabréfum Samsonar og 8,7 milljörðum á skuldabréfum Eimskips. Samtals nemur þetta rúmlega 74 milljörðum króna.

Björgólfsfeðgar og tengd félög voru ráðandi hluthafar í öllum þessum fyrirtækjum.

Fram kom á kynningunni á föstudag að Landsbankinn hefði ekki nema að litlu leyti fjármagnað sig hjá lífeyrissjóðunum með útgáfu skuldabréfa. Einn nefndarmanna, Héðinn Eyjólfsson, taldi skýringuna liggja í því að bankinn hefði fjármagnað sig að svo miklu leyti með Icesave að hann hefði ekki þurft á aðstoð lífeyrissjóðanna að halda, en tók fram að hann hefði í raun ekkert fast í hendi til að styðja þessa tilgátu sína.

Ragnhildur Sverrisdóttir, talsmaður Björgólfs Thors, sagði í samtali við fréttastofu að hann vildi ekki tjá sig um efni skýrslunnar að svo stöddu. thorbjorn@stod2.is