Konur skrifa í Markaðinn

Breyting hefur verið gerð á föstum dálki í Markaðnum, fylgiblaði Fréttablaðsins. Frá og með tölublaðinu sem kom út í dag mun dálkurinn á baksíðu, sem áður hét „Bankahólfið", heita „Hin hliðin" og hafa átta konur með mismunandi aðkomu og sýn á viðskipti og efnahagsmál samþykkt að skiptast á að skrifa hann. Pistlar þeirra munu einnig birtast hér á Vísi sama dag og Markaðurinn kemur út. Breytingin hefur verið unnin í nánu samstarfi við Félag kvenna í atvinnurekstri (FKA).

Fyrsti pistilinn, sem birtur er á baksíðu Markaðarins í dag, er skrifaður af Rúnu Magnúsdóttur, ACC stjórnendamarkþjálfa, stofnanda Connected-Women.com og Brandit. Aðrir höfundar sem munu skrifa reglulega eru Guðrún Högnadóttir hjá Franklin Covey, Hulda Bjarnadóttir, framkvæmdastjóri FKA, Ingibjörg Gréta Gísladóttir hjá Reykjavík Runway, Vilborg Aldís Ragnarsdóttir, eigandi og stofnandi Arca Design, Þórey Vilhjálms dóttir, framkvæmdastjóri borgarstjórnarflokks Sjálfstæðisflokksins, Þórunn Jónsdóttir, stofnandi og eigandi FAFU og María Lovísa Arnardóttir, markþjálfari og innanhússarkitekt.