Bjartsýni Íslendinga eykst með hækkandi sól

Bjartsýni eykst nú að nýju með hækkandi sól og styrkingu á gengi íslensku krónunnar.

Íslendingar virðast vera að jafna sig aðeins á svartsýniskastinu sem var allsráðandi í mars mánuði samkvæmt væntingavísitölu Capacent Gallup sem birt var í gærmorgun. Vísitalan hækkar um 5,6 stig og mælist nú 71,3 stig en aðeins tvisvar áður frá hruni hefur vísitalan farið yfir 70 stig. Það var í janúar og febrúar sl. áður en svartsýnin tók öll völd í mars þegar vísitalan lækkaði um 11 stig.

Fjallað er um málið í Morgunkorni greiningar Íslandsbanka. Þar segir að væntingavísitalan hafi sterka fylgni við gengisþróun krónunnar. Því komi ekki á óvart að hún hækki lítillega nú þegar veikingarhrina krónunnar sem staðið hefur yfir síðan um miðjan febrúar hefur stöðvast um stund.

Ennþá eru þó fleiri neikvæðir en jákvæðir en þegar væntingavísitalan er undir 100 stigum eru fleiri svarendur neikvæðir en jákvæðir. Vísitalan fór síðast yfir 100 stig í febrúar árið 2008.