Greining Íslandsbanka mælir með kaupum á Marel bréfum

Greining Íslandsbanka ráðleggur fjárfestum að kaupa hlutabréf í Marel, sé mið tekið af nýrri greiningu frá sérfræðingum bankans. Verðmatsgengi bréfa félagsins í greiningunni er skráð 150,8, en lokagengi í viðskiptum 20. janúar, sem tiltekið er í greiningunni, var 136. Gengi bréfa í Marel hefur lækkað um 0,37% það sem af er degi í viðskiptum í Kauphöll Íslands.

Markaðsvirði félagsins er í greiningunni sagt vera ríflega 100 milljarðar króna.

Greiningin byggir meðal annars á því að pantanastaða Marels er góð í augnablikinu en hún er sögð nema um hálfsárstekjum eins og mál standa nú og gefa góð fyrirheit fyrir fyrstu fjórðunga ársins 2012. Þá er félagið sagt vera með traustan efnahag sem hafi ekki orðið fyrir mælanlegum áhrifum af lækkun framleiðsluvísitala á helstu markaðssvæðum og versnandi hagvaxtarhorfum.