Áhugi á Drekasvæði veltur á árangri í Noregshafi

Nýfundnar olíulindir í Barentshafi og Norðursjó draga úr áhuga á Drekasvæði Íslendinga, að mati helsta sérfræðings Noregs um olíuiðnaðinn. Hann telur möguleika Íslendinga ráðast af því hversu vel gangi að finna olíu í vesturhluta Noregshafs en þar eru nokkrir helstu olíurisar heims nú að leita.

Hans Henrik Ramm, einn kunnasti ráðgjafi Norðmanna um olíumál, hefur fylgst grannt með Drekaútboðum Íslendinga og taldi fyrir tveimur árum að íslensk stjórnvöld hefðu sjálf átt stóran þátt í að klúðra fyrsta útboðinu með óskynsamlegri skattalöggjöf. Nú þegar tíu vikur eru í að frestur renni út í útboði númer tvö segir Hans Henrik í samtali við Stöð 2 að Íslendingar hafi ástæðu til bjartsýni í olíumálum þegar horft sé til lengri tíma en telur meiri óvissu ríkja um útboðið nú.

Hann segir jákvætt að vilji til að fjárfesta sé miklu meiri núna, Norðmenn hafi opnað Jan Mayen-svæðið til rannsókna og upplýsingar frá Olíustofnun Noregs gefi til kynna að það líti betur út en búist var við. Á hinn bóginn séu olíufélög í Noregi drekkhlaðin verkefnum eftir að nýjar olíulindir fundust í Barentshafi og Norðursjó. Barentshafið sé heitasta svæðið og lítið rætt um Jan Mayen og Ísland.

Hans Henrik nefnir að olíufélögin tvö sem sóttu um Drekasvæðið fyrir tveimur árum, Sagex og Aker Exploration, hafi nú bæði sameinast öðrum félögum, sem hafi ærin verkefni í Barentshafi eða starfa eingöngu á norska landgrunninu. Þá sé Statoil í gríðarstórum verkefnum og telji sig kannski hafa næga tíma gagnvart Jan Mayen meðan aðrir meldi sig ekki. Statoil muni þó fyrr eða síðar vilja tryggja stöðu sína á íslenska Drekasvæðinu, sérstaklega ef aðrir sýni því áhuga, að mati Hans Henrik. Umsókn frá öðrum olíurisa muni örugglega kveikja þeirra áhuga.

Möguleika Íslendinga telur Hans Henrik Ramm helst felast í vaxandi áhuga olíufélaga á vesturhluta Noregshafs. Hann bendir á að jarðfræðin á Drekasvæðinu sé sú sama, hraunlög sem erfitt hafi verið að sjá í gegnum, en virðist engu að síður lofa góðu. Olíurisar á borð við ExxonMobil, Chevron, Statoil og BG séu komnir með leitarleyfi í vestanverðu Noregshafi. Olíustofnun Noregs telji að þar fari vinnsla í gang og ef það gerist muni þessi fyrirtæki einnig horfa vestar í átt til Drekans og Jan Mayen.

Það muni þó taka tíma og telur Hans Henrik að þótt olíumálaráðherra Noregs hyggist vorið 2013 fá heimild norska Stórþingsins til að opna Jan Mayen-svæðið til leitar verði vart farið í útboð þar fyrr en í fyrsta lagi 2015 eða 2016.