Skilvísir geti notið þess í kjörum

Creditinfo á Íslandi hefur ýtt úr vör nýrri þjónustu þar sem áhætta einstaklinga á því að enda á vanskilaskrá er metin. Vonast fyrirtækið til þess að skilvísir einstaklingar geti nýtt sér áhættumat frá fyrirtækinu til að fá betri kjör í viðskiptum.

„Þetta er stór nýjung í íslensku viðskiptalífi,“ segir Samúel Ásgeir White, forstöðumaður fyrirtækjasviðs Creditinfo, og bætir við að það sé vel þekkt í nágrannalöndum Íslands að einstaklingar láti gera slíkt áhættumat sem oft sé krafist þegar einstaklingar sækja um reikningsviðskipti, lán eða annað þess háttar.

„Þetta býður einnig upp á það að Íslendingar sem eru með sín fjármál á hreinu, og fá þar með gott áhættumat, geta nýtt sér matið til að fá betri kjör í viðskiptum. Það er með öðrum orðum hægt að umbuna þeim sem eru skilvísir og með sitt á hreinu, til dæmis við lántöku,“ segir Samúel og heldur áfram: „Við erum búin að vera að þróa áhættumatið í nokkur ár en það verður aðgengilegt fyrir einstaklinga á næstu vikum í gegnum vefsíðu okkar. Það eru hins vegar nokkur fyrirtæki þegar byrjuð að innleiða þjónustuna með það fyrir augum að hafa áhættumatið til hliðsjónar við ákvarðanir um lánveitingar.“

Áhættumat Creditinfo flokkar einstaklinga, sem ekki eru nú þegar í alvarlegum vanskilum, í áhættuhópa sem byggja á líkunum sem Creditinfo telur á því að viðkomandi lendi í alvarlegum vanskilum á næstu tólf mánuðum. Reiknilíkan fyrirtækisins byggir á fjölmörgum misveigamiklum þáttum en í hópi þeirra eru aldur, búseta, upplýsingar úr skatta- og útsvarsskrá, upplýsingar um söguleg vanskil og tengsl við fyrirtæki.

Samúel segir að líkanið byggi á mjög ýtarlegum gagnagrunni Creditinfo en fyrirtækið hefur um árabil áhættumetið fyrirtæki á sama hátt og nú stendur til að gera með einstaklinga. Þá segir hann að spástyrkur reiknilíkansins sé mjög mikill en það byggir á samráði við erlenda sérfræðinga.

Creditinfo hefur gilt starfsleyfi frá Persónuvernd sem er skilyrði fyrir skráningu og miðlun upplýsinga um fjárhagsmálefni og lánstraust.- mþl