Færri leigusamningum þinglýst en í fyrra

775 leigusamningum var þinglýst á landinu öllu í júlí á þessu ári. Það er tæpum tveimur prósentum eða 15 samningum minna en í júlí í fyrra.

Hins vegar var 11,4% fleiri samningum þinglýst í júlí heldur en júní í ár. Leigumarkaðurinn stækkar því milli mánaða.

Þjóðskrá Íslands tók saman upplýsingar um fjölda þinglýstra leigusamninga í júlí eftir landshlutum. Fæstum samningum var þinglýst á Vestfjörðum eða tveimur. Langflestum samningum var þinglýst á höfuðborgarsvæðinu eða 559.

Ef rýnt er í tölur síðustu ára um þinglýsta leigusamninga kemur í ljós að leigumarkaðurinn nær tvöfaldast í ágúst og september á hverju ári miðað við aðra mánuði. Ætla má að skýringin á því sé sú að um þetta leyti fer ungt skólafólk að leita sér að leiguhúsnæði fyrir veturinn. Til skýringar má nefna að í júlí í fyrra var 790 samningum þinglýst en í september voru samningarnir 1469.