Félag Skúla tapaði 135 milljónum

Títan fjárfestingafélag, sem er í 100 prósenta eigu Skúla Mogensen, tapaði 135 milljónum króna á síðasta ári. Eigið fé félagsins um síðustu áramót var neikvætt um 102 milljónir króna. Það tapaði 44,5 milljónum króna árið áður. Eignir félagsins eru metnar á rúmlega 1,3 milljarða króna.

Títan á meðal annars 17,3 prósenta hlut í MP banka, 90 prósenta hlut í flugfélaginu Wow Air, 5,17 prósenta hlut í Advania og 17,7 prósenta hlut í Carbon Recycling International.

Skuldir félagsins nema 1,4 milljörðum króna og eru allar við Skúla sjálfan eða félög í hans eigu.

Skúli og eiginkona hans, Margrét Ásgeirsdóttir, voru efst á lista Viðskiptablaðsins yfir 170 helstu auðmenn landsins reiknað út frá auðlegðarskatti. Hjónin greiddu nálægt 150 milljónum króna í auðlegðar- og viðbótarauðlegðarskatt vegna ársins 2011. Hrein eign þeirra hjóna nemur því um 7,5 milljörðum króna samkvæmt álagningarskrám ríkisskattstjóra.

Skúli hagnaðist á því að selja fyrirtækið Oz til finnska farsímarisans Nokia haustið 2008.