Íslenskt fyrirtæki fær einkaleyfi í Bandaríkjunum

Íslenska fyrirtækið Carbon Recycling International hefur fengið einkaleyfi í Bandaríkjunum á aðferð sinni til framleiðslu á endurnýjanlegu metanóli. Einkaleyfið er mikilvæg staðfesting á brautryðjendastarfi fyrirtækisins, segir í fréttatilkynningu.

Fyrirtækið notar aðferðina í verksmiðju sinni í Svartsengi til að framleiða metanól sem nota má til að knýja bifreiðar, efnarafala eða framleiða efnavöru. Verksmiðjan opnaði formlega fyrr á þessu ári.

Verksmiðjan nýtir koltvísýring, sem losaður er frá jarðvarmavirkjun HS Orku í Svartsengi og vetni sem unnið er úr vatni með rafgreiningu til framleiðslunnar.

Endurnýjanlegt metanól er vistvænt og kraftmikið eldsneyti með háa oktantölu sem blanda má við bensín. 3% blanda bensíns og metanóls hentar öllum bílum.