Eignir tryggingafélaga lækkuðu aðeins

Heildareignir tryggingafélaganna námu 148,6 milljörðum kr. í lok nóvember og lækkuðu um rúmar 100 milljónir kr. á milli mánaða.

Þetta kemur fram í hagtölum Seðlabankans. Þar segir að útlán og markaðsverðbréf námu 98 milljörðum kr. og hækkuðu um 842 milljónir kr. á milli mánaða. Verðtryggð markaðsskuldabréf hækkuðu um tæpa 2 milljarða kr. en útlán lækkuðu um tæpa 1,2 milljarða kr. í nóvember.

Skuldir tryggingafélaganna námu 82 milljörðum kr. sem er að stærstum hluta vátryggingaskuld eða sem nemur 77 milljarða kr. Eigið fé tryggingafélaga hækkaði um 1,5 milljarða kr. og nam 66,6 milljörðum kr. í lok mánaðarins.