Stefnir í 60 prósent fjölgun ferðamanna með skemmtiferðaskipum

„Þá stefnir í metfjölda skemmtiferðaskipa til landsins á komandi sumri. Samkvæmt upplýsingum Faxaflóahafna hafa nú þegar 77 erlend skemmtiferðaskip tilkynnt um komu sína komandi sumar. Áætlun Faxaflóahafna miðar við 100 þúsund erlenda gesti með skemmtiferðaskipum í sumar samanborið við 63 þúsund í fyrra. Það er 59% aukning!," segir í grein Steingríms J. Sigfússonar, efnahags-, viðskipta-, sjávarútvegs-, og landbúnaðarráðherra, í Fréttablaðinu í dag.

Hann segir íslenska ferðaþjónusta sé á „fljúgandi siglingu“. Margt bendir til þess að árið í ár verði gott ár fyrir ferðaþjónustuna, eins og fram kom í fréttum Stöðvar 2 í gær. Að líkindum verða um 650 þúsund erlendir ferðamenn sem koma hingað til lands á þessu ári, sem er um 12 prósent meira en í fyrra. Fjölgunin gæti orðið enn meiri, ef mið er tekið af frystu þremur mánuðum ársins en á þeim nam fjölgunin frá sama tímabili í fyrra um 20 prósentum.

Í greininni segir Steingrímur að helsta skýringin sé á fjölgun ferðamanna með skemmtiferðaskipum sé aukning í komu stærri skemmtiferðaskipa. „Þessi aukning mun ekki mælast í opinberum tölum um fjölda erlendra ferðamanna þar sem farþegarnir gista um borð í skipunum en ekki á hótelum og gistiheimilum. Það jákvæða við þessa þróun er sú að skipin stoppa nú mörg lengur en áður, sum í 1-2 sólarhringa.“

Sjá grein Steingríms hér.