Richard Thomans: Bankakreppa í Evrópu í tvö ár í viðbót

Greinandinn Richard Thomas segir að óvissan á evrusvæðinu sé helsta vandamál svæðisins í augnablikinu. Bankarnir sem slíkir standi ekki eins illa og margir halda, sagði í erindi í Hörpunni í gær. Thomas varaði sterklega við hruni íslenska bankakerfisins sumarið 2008, en var þá sagt að hann þyrfti á endurmenntun að halda.

Thomas, sem er greinandi hjá Bank of America Merril Lynch bankanum, sagði í erindi sínu á ársfundi Bankasýslu ríkisins í gær, að staða banka í Evrópu væri mjög misjöfn, en heilt yfir væri áhættuálag á skuldir þjóðríkja og banka, of hátt miðað við öll helstu viðmið sem notuð væru á skuldabréfamörkuðum.

Mikil óvissa væri einkennandi fyrir markaði sem hefði mikil áhrif á gang mála, og ákvarðanatöku fjárfesta, sem bæri þess glögg merki í augnablikinu að þeir vildu frekar bíða og sjá hvað myndi gerast þegar kæmi að evrusvæðinu í heild. Hann sagðist reikna með því að bankakreppa á evrasvæðinu stæði líklega yfir í a.m.k. tvö ár í viðbót, eða fram á seinnipart árs 2014.

Richard Thomas vakti nokkra athygli hér á landi þegar hann sagði stöðu íslenska bankakerfisins grafalvarlega á sumarmánuðum 2008, og að stjórnvöld yrðu að bregðast við hratt og örugglega, jafnvel með þjóðnýtingu allra bankanna. Þorgerður Katrín Gunnarsdóttir, þingkona og ráðherra, brást við þeim ummælum með því að spyrja að því hvort Thomas þyrfti á endurmenntun að halda. Þorgerður Katrín baðst síðar afsökunar á ummælunum.