Fjórtán bæjarstjórar með yfir milljón í grunnlaun

Grunnlaun bæjarstjóra á Íslandi eru æði misjöfn, allt frá 400 þúsund krónum og upp í 1,2 milljónir króna. Ofan á það geta svo lagst ýmis konar hlunnindi sem geta numið allt að 350 þúsund krónum.

Á landinu eru 14 bæjarstjórar, eða framkvæmdastjórar sveitarfélaga, með yfir eina milljón króna í föst grunnlaun. Þar af eru tveir með yfir 1,2 milljónir. Þetta kemur fram í skýrslu sem Samband íslenskra Sveitarfélaga lét gera.

Þá eru fimm bæjarstjórar með yfir 200 þúsund krónur í hlunnindi, þar af einn með yfir 300 þúsund. Hlunnindi eru skilgreind sem greiðslur fyrir utan beinar launagreiðslur, s.s. fastur bifreiðastyrkur, frír bíll, frír sími, risna og húsnæðiskostnaður.

Í skýrslu sambandsins kemur ekki fram um hvaða sveitarfélög er að ræða. Aðeins er þar að finna yfirleit yfir allar greiðslurnar. Hér má lesa skýrsluna.