Eignirnar jukust um 30 milljarða

Eignir lífeyrissjóðanna jukust um 30 milljarða króna í september síðastliðnum og er það mesta aukning eigna í einum mánuði síðan í mars síðastliðnum. Greining Íslandsbanka segir frá því í dag að það sem af er þessu ári hafa eignir lífeyrissjóðanna aukist um að meðaltali 22 milljarða króna í mánuði hverjum og er aukningin í október því mun meiri en verið hefur að meðaltali undafarna mánuði.

Eignirnar jukust um ríflega 1% og nam hrein eign lífeyrissjóðanna í lok september 2.294 milljörðum króna. Aukningin er að tilkomin vegna mikillar aukningar erlendra eigna sjóðanna en erlendar eignir jukust um 4% í september á meðan innlendar eignir lækkuðu um 0,1% á sama tímabili. Erlendar eignir jukust um 18,8 milljarða króna. í ágúst en innlendar eignir drógust saman um 1,5 milljarða króna sama tímabili.

Aukningin í erlendum eignum sjóðanna er tilkomin vegna samspils gengisþróunar og góðs gengis erlendra hlutabréfamarkaða í mánuðinum en alls  hækkuðu erlendar eignir lífeyrissjóðanna í hlutabréfasjóðum og hlutabréfum um rúmlega 17 ma. kr í september.