Greining Íslandsbanka ráðleggur sölu á Hagabréfum

Greining Íslandsbanka ráðleggur fjárfestum að selja hlutabréf í Högum, rekstraraðila Bónus og Hagkaupa, í greiningu frá 25. maí sl. Í fyrirtækjagreiningu bankans á Högum kemur fram að verðmatsgengið í greiningunni á félaginu sé 17, en í lok dags 25. maí var gengið 18,95. Ráðgjöfin til fjárfesta er því að selja bréfin.

Í greiningunni, sem fréttastofa hefur undir höndum, kemur fram að söluvöxtur á síðasta rekstrarári hafi verið undir verðbólgu og að framlegð rekstrarins hafi versnað.

Markaðsvirði félagsins miðað við 18,95 er 22,2 milljarðar króna, að því er fram kemur í greiningunni.

Aðalfundur Haga fer fram 8. júní nk. og hyggst stjórnin leggja þar tillögu um arðgreiðslustefnu. Að því er segir í greiningunni verður lagt til að 0,45 krónur á hvern hlut í fyrirtækinu verði greitt í arð, sem nemur um 527 milljónum króna. Verði þessi arðgreiðsla samþykkt á aðalfundinum, þá nemur hún um 22 prósent af hagnaði síðasta rekstrarárs fyrirtækisins.

Sjá má upplýsingar um íslenska markaðinn hér, en lokagengi Haga í dag var 18,65, eftir 0,27 prósent hækkun.