Tækifærin fólgin í að fá ferðamenn til þess að eyða meira

Háannatímabil ferðaþjónustunnar er nú að hefjast en næstum helmingur allra ferðamanna sem heimsækir Ísland ár hvert kemur til landsins yfir sumarmánuðina. Gögn frá Datamarket sýna að tækifærin í ferðaþjónustunni séu ekki endilega fólgin fjölgun ferðamanna, heldur frekar að fá þá til þess að eyða meiru.

Ferðaþjónustan hefur vaxið hratt undanfarin ár, en blómatími hennar á hverju ári eru sumarmánuðirnir þrír. Gögn sem Datamarket hefur tekið saman, um ferðaþjónustuna, sýna nokkuð vel hvernig landið liggur þegar kemur að henni.

Sé horft sérstaklega til ársins í fyrra, þá komu um 540 þúsund erlendir ferðamenn hingað til lands, og fjölgaði þeim um meira en 80 þúsund milli ára. Tæplega helmingur þeirra komu yfir sumarmánuðina, í júní, júlí og ágúst, en sá síðastnefndi er stærsti ferðamannamánuður ársins.

Þegar eyðsla hvers ferðamanns er skoðuð, kemur í ljós að kannski liggur sóknarfærið í ferðaþjónustunni ekki í því að fjölga ferðamönnum, heldur frekar í því að fá þá til þess að eyða meiru, þ.e. að selja þeim meiri þjónustu.

Eins og sést á þessari mynd, hefur meðaleyðsla hvers ferðamanns ekki aukist að neinu ráði, þrátt fyrir mikla fjárfestingu í greininni og hraða fjölgun. Árið 2010 fór meðaleyðsla hvers ferðamanns í 160 þúsund krónur, en í fyrra var hún í kringum 120 þúsund krónur, miðað við upplýsingar um kortanotkun ferðamanna.

Ítarlega verður fjallað um stöðu íslenskrar ferðaþjónustu, í Markaðnum sem fylgir Fréttablaðinu á morgun.