AGS: Ekki hægt að aflétta gjaldeyrishöftunum næstu þrjú árin

Alþjóðagjaldeyrissjóðurinn (AGS) telur að Íslendingar verði að viðhalda gjaldeyrishöftum sínum a.m.k. út árið 2015 vegna erfiðleika við að leysa aflandskrónuvandann eða hina svokölluðu snjóhengju sem vofir yfir íslensku efnahagslífi.

Þetta kemur fram í nýrri skýrslu frá sjóðnum um efnahagsástandið á Íslandi. Þar segir að íslenska efnahagskerfið sé að ná sér á strik þótt verðbólga sé áfram mikil.

Þá hefur sjóðurinn áhyggjur af því að kreppan á evrusvæðinu geti leitt til þess að útflutningstekjur þjóðarinnar minnki og að draga muni úr erlendri fjárfestingu.

Fjallað er um skýrsluna á vefsíðu Seðlabankans en þar segir að forráðamenn AGS lýstu almennt ánægju sinni með þann árangur sem náðst hefur á sviði efnahagsmála eftir hrun fjármálakerfisins árið 2008. Einnig var lýst ánægju með að Ríkissjóður Íslands hefur náð að endurnýja aðgang að erlendum lánamarkaði, sem aftur hefur gert ríkissjóði og Seðlabanka Íslands kleift að endurgreiða fyrirfram hluta af lánum sínum til Alþjóðagjaldeyrissjóðsins og Norðurlandanna.

„Hins vegar kom fram að veruleg áhætta gæti stafað frá efnahagssamdrætti á evrusvæði og ýmsum innlendum þáttum. Stuðningi var lýst við árangurstengda áætlun um afnám gjaldeyrishafta sem miðar meðal annars að því að minnka krónueignir erlendra aðila. Framkvæmdastjórnin taldi nauðsynlegt að markmið um hallalausan ríkisrekstur náist á tilsettum tíma," segir á vefsíðunni.

„Þá var talið æskilegt að auka aðhald peningastefnunnar til að ná verðbólgumarkmiðinu, en stilla þyrfti aðgerðir af til samræmis við aukinn efnahagsbata. Áfram þarf að styrkja fjármálakerfið með því að tryggja nægilegt eigið fé fjármálastofnana og öflugt fjármálaeftirlit."