Yfir 700 viðskipti með Eimskip í Ávöxtunarleiknum

Samtals áttu þátttakendur í Ávöxtunarleiknum, sem nú eru orðnir ríflega 5.500 talsins, 724 viðskipti með bréf Eimskipafélagsins á fyrsta degi á markaði sl. föstudag, en á hinum raunverulega markaði voru viðskiptin 82.

Af þessum 724 viðskiptum voru einungis 64 viðskipti söluviðskipti.

Ávöxtunarleikurinn gengur út á það að fjárfesta í félögum og eignaflokkum á íslenska markaðnum, eftir reglum leiksins, og reyna með því að ávaxta eignirnar sem best. Hver þátttakandi byrjar með 10 milljónir í spilapeningum, og freistar síðan gæfunnar í fjárfestingum.

Sá sem er efstur í leiknum núna er Stefán Jónsson en hann hefur ávaxtað spilapeninga sína um ríflega 37 prósent, frá 1. október sl. þegar leikurinn fór af stað.

Munar ekki síst um þann möguleika í leiknum, hjá mörgum þeim sem hafa ávaxtað eignir sínar vel, að geta keypt og selt innan dags, án þess að þóknanir séu greiddar, eins og í raunverulegum viðskiptum.

Til mikils er að vinna, en sigurvegarinn fær ferð til New York fyrir tvo auk þess að fá 200 þúsund krónur í sjóðum VÍB, eignastýringarþjónustu Íslandsbanka. Þá fær hástökkvari mánaðarins, þ.e. sá sem nær bestu ávöxtuninni í hverjum mánuði, sérstök aukaverðlaun. Keppnistímabilinu lýkur síðan 31. maí, en spilarar geta hafið leik hvenær sem er fram að þeim tíma.

Leikurinn er í eigu Keldunnar, en samstarfsaðilar verkefnisins eru VÍB, Nasdaq OMX Kauphöll Íslands, Libra og Vísir.is.

Hér er hægt að skrá sig til leiks, og hér er facebook síða leiksins.