Laun hækkuðu meira á almennum markaði en hjá hinu opinbera

Regluleg laun voru að meðaltali 1,6% hærri á fjórða ársfjórðungi síðasta árs en í ársfjórðungnum á undan. Frá fyrra ári hækkuðu laun um 8,7% að meðaltali, hækkunin var 9,4% á almennum vinnumarkaði og 7,2% hjá opinberum starfsmönnum.

Þetta kemur fram á vefsíðu Hagstofunnar. Þar segir að frá fyrri ársfjórðungi mældist hækkun reglulegra launa í samgöngum og flutningum 2,2% en í byggingarstarfsemi og mannvirkjagerð var hækkunin 0,6%. Frá fyrra ári hækkuðu laun mest í fjármálaþjónustu, lífeyrissjóðum og vátryggingum eða um 10,9% en minnst í byggingarstarfsemi og mannvirkjagerð um 7,1%.

Þá hækkuðu laun þjónustu-, sölu og afgreiðslufólks mest frá fyrri ársfjórðungi eða um 2,4% en laun stjórnenda hækkuðu að meðaltali um 1,0% á sama tímabili. Laun verkafólks hækkuðu mest frá fyrra ári eða um 10,4% en laun stjórnenda hækkuðu minnst, um 7,6%.