Hópur fjárfesta undir forystu lífeyrissjóða að eignast TM

Hópur fjárfesta sem samanstendur meðal annars af Lífeyrissjóði verzlunarmanna og Almenna lífeyrisjsóðnum er langt kominn með að ganga frá kaupum á Tryggingamiðstöðinni af Stoðum, áður FL Group. Á annan tug milljarða króna gætu fengist fyrir félagið, sem er eitt stærsta tryggingafyrirtæki landsins.

Stoðir, áður FL Group, halda á 99,9 prósentum hlutafjár í Tryggingamiðstöðinni.

Fyrirtækið hefur verið í söluferli sem staðið hefur yfir frá 29. mars og var óskuldbindandi tilboðum var skilað inn 4. maí.

Í fyrstu voru 5 fjárfestahópar sem þóttu frambærilegastir að mati Landsbankans sem er ráðgjafi Stoða við söluna.

Þrír aðilar skiluðu inn bindandi tilboðum í síðasta mánuði og að lokum voru teknar upp viðræður við einn hóp fjárfesta sem fyrirtækjaráðgjöf Íslandsbanka hefur farið fyrir.

Á bak við þennan hóp standa meðal annars Lífeyrissjóður verzlunarmanna og Almenni lífeyrissjóðurinn og mynda þeir eins konar hryggjarstykki í hópnum, samkvæmt heimildum fréttastofu. Í hópnum eru einnig aðrir minni lífeyrissjóðir, aðilar í eignastýringu hjá VÍB eignastýringu Íslandsbanka og sjóðir á vegum Íslandssjóða.

TM er verðmætasta eign Stoða, en stærstu hluthafar Stoða eru skilanefnd Glitnis, Landsbankinn og Arion banki.

Ljóst er að á annan tug milljarða króna gætu fengist við söluna á TM, en bókfært virði eiginfjár fyrirtækisins var 12,2 milljarðar króna um síðustu áramót. Fyrirtækið skilaði 3,4 milljarða króna hagnaði í fyrra.

Júlíus Þorfinnsson, framkvæmdastjóri Stoða, sagði í samtali við fréttastofu að viðræður vegna sölunnar á TM væru langt komnar en vildi ekki tjá sig um málið að öðru leyti. thorbjorn@stod2.is