Hreiðar: Lög brotin í Al Thani-málinu

Refsivert lögbrot átti sér stað í Al Thani-málinu, að sögn Hreiðar Más Sigurðssonar, fyrrverandi forstjóra Kaupþings. Hann beri hins vegar ekki ábyrgð á því, heldur undirmenn hans, og sérstakur saksóknari hafi ekki einu sinni ákært fyrir þann þátt málsins.

Þetta kemur fram í greinargerð Hreiðars, sem lögð hefur verið fram í Héraðsdómi Reykjavíkur.

Mesta púðrið í greinargerðinni fer í að rökstyðja að ákæran í Al Thani-málinu, á hendur Hreiðari Má, Sigurði Einarssyni, Magnúsi Guðmundssyni og Ólafi Ólafssyni, sé byggð á sandi og að Hreiðar hafi hvergi brotið lög.

Hins vegar er fullyrt í greinargerðinni að uppgjör ábyrgðartryggingar sjeiks Al Thani, sem fram fór 8. október 2008, sama dag og Kaupþing féll, hafi verið lögbrot og að öllum líkindum refsivert.

Þar er vísað til þess þegar Al Thani var leyft að kaupa krónur fyrir fimmtíu milljóna dollara lán frá Kaupþingi á aflandsgengi, sem tryggði að féð dugði nákvæmlega fyrir 12,6 milljarða sjálfsábyrgð hans vegna lána til kaupa í bankanum.

Í greinargerðinni segir að það sé með ólíkindum að ákært hafi verið fyrir lánið en ekki þessa fléttu undirmannanna.