Opið málþing um veiðisumarið og verð á veiðileyfum

Opið málþing um stöðu stangaveiði á Íslandi verður haldið á Grand Hóteli á laugardaginn. Meðal annars verður rætt um slakt veiðisumar og verð á veiðileyfum. Landssamband stangaveiðifélaga stendur fyrir málþinginu sem hefst klukkan 14 og stendur til klukkan 17.

„Frummælendur koma frá helstu hagsmunaaðilum í stangaveiði á Íslandi, en stangaveiðin stendur á ákveðnum tímamótum eftir síðasta veiðisumar," segir í tilkynningu frá Landssambandi stangaveðifélaga. „Laxveiði var í lágmarki á meðan að verð á veiðileyfum hefur hækkað hvort sem um er að ræða lax- eða silungsveiði. Ekki er útlit er fyrir að hækkun veiðileyfa verði minni á næstu misserum og hafa veiðileyfasalar áhyggjur af dvínandi sölu á meðan að íslenskir veiðimenn hafa auknar áhyggjur af verðhækkunum og ásókn erlendra veiðimanna í íslenskar ár og vötn."

Af þessu tilefni hefur Landssamband stangaveiðifélaga ákveðið að efna til málþings um stöðu stangaveiða á Íslandi í samstarfi við hagsmunaaðila.

„Það er ætlun sambandsins að málþingið verði grundvöllur til að ræða opinskátt um stöðu og þróun stangaveiða á Íslandi og eru allir áhugasamir hvattir til þess að mæta og hlýða á erindi frummælenda og taka þátt í umræðum," segir í tilkynningu.

Dagskráin á Grand hóteli á laugardaginn:

14.00 Setning. Viktor Guðmundsson, formaður Landssambands Stangaveiðifélaga.

14.05 Laxveiðin sumarið 2012. Hvað er að gerast í ánum? Guðni Guðbergsson, fiskifræðingur frá Veiðimálastofnun.

14.25 Laxveiðin sumarið 2012. Áhrif sjávar á laxveiðina. Var hægt að sjá veiðiminnkun fyriri? Sigurður Már Einarsson, fiskifræðingur frá Veiðimálastofnun.

14.45 Stangaveiðifélög og stangaveiðimenn. Bjarni Júlíusson, formaður Stangaveiðifélags Reykjavíkur.

15.00 Kaffihlé

15.15 Óðinn Sigþórsson, formaður Landssambands Veiðifélaga, flytur erindi.

15.30 Þröstur Elliðason, forstjóri Veiðiþjónustunnar Strengja, flytur erindi.

15.45 Steinar J. Lúðvíksson veiðimaður flytur erindi.

16.00 Pallborðsumræður.

17.00 Málþingi slitið.

trausti@frettabladid.is