Hagstofan mælir minnsta atvinnuleysi í maí í fjögur ár

Samkvæmt Vinnumarkaðsrannsókn Hagstofu Íslands voru í maí 2012 að jafnaði 186.500 manns á vinnumarkaði. Af þeim voru 170.600 starfandi og 15.900 án vinnu og í atvinnuleit. Atvinnuþátttaka mældist 83,1%, hlutfall starfandi 76% og atvinnuleysi var 8,5%. Atvinnuleysi hefur lækkað um 2,5 prósentustig frá því í maí 2011 en þá var atvinnuleysi 11%. Atvinnuleysi hefur ekki mælst lægra í maí mánuði frá því 2008 þegar það mældist 4,3%.

Atvinnuleysi mælist alltaf hæst í maí mánuði. Munar þar mestu að ungt fólk kemur inn á vinnumarkaðinn í auknum mæli í leit að starfi. Í maí 2012 var atvinnuleysi á meðal 16-24 ára 24,3% á meðan það var 4,8% hjá 25 ára og eldri.

Atvinnulausir teljast þeir sem voru án atvinnu í viðmiðunarviku könnunarinnar, þ.e. höfðu hvorki atvinnu né voru í vinnu (í eina klukkustund eða lengur) sem launþegi eða sjálfstætt starfandi, eru að leita að vinnu og geta hafið störf innan tveggja vikna eða hafa fengið starf sem hefst innan 3 mánaða. Einstaklingar sem eru ekki í vinnu en eru í námi flokkast atvinnulausir ef þeir uppfylla skilyrðin hér að ofan.

Starfandi fólki fjölgaði um 5.100 frá því í maí 2011. Hlutfall starfandi hækkaði um 2 prósentustig, úr 74% í 76%.

Árstíðaleiðréttur fjöldi atvinnulausra í maí 2012 var 8.800 eða 4,9% en var 12.000 eða 6,6% í apríl. Fjöldi starfandi var 170.700 í maí 2012 eða 76,9% en var 168.600 í apríl eða 75%. Samkvæmt árstíðaleiðréttingu voru heildarvinnustundir á viku jafn margar í maí og apríl 2012 eða 39,5 klst. Leitni árstíðaleiðréttingar sýnir að atvinnuleysi hefur lækkað nokkuð jafnt síðustu 12 mánuði eða um 1,4 prósentustig.