Bensínverð gæti hækkað enn meira ef átök brjótast út í Íran

Sú ákvörðun Írana að setja sölubann á olíu til Bretlands og Frakklands mun líklegast ekki hafa áhrif á heimsmarkaðsverð á olíu til skamms tíma, segir Hermann Guðmundsson, forstjóri N1, í samtali við Vísi. Almennur ótti við að það skelli á strið vofir þó yfir.

Hermann segir ef Íranir setji sölubann á Frakka og Breta fari þeir einfaldlega á aðra markaði og kaupi olíuna þar. Svo muni aðrir koma í þeirra stað og kaupa olíuna af Írönum. „Ég myndi halda að þetta ætti ekki að hafa nein umtalsverð áhrif til skemmri tíma. En þetta er allt liður i þvi sem við erum búin að vera að horfa uppá síðustu tvo mánuði. Vesturlönd eru svolítið að skaka vopnum framan í Íran og Íranir eru svolítið að skella skollaeyrunum við. Þeir vilja halda frammi sínum rétti til að fara sínu fram í sínum kjarnorkutilraunum. Allt gæti þetta síðan leitt af sér vopnuð átök sem myndu án efa hafa veruleg áhrif á olíumarkaðinn vegna þess að Íran er jú eitt af stóru löndunum á olíumarkaðnum," segir Hermann.

Það er því allt eins líklegt að til langs tíma myndu átökin hafa áhrif á heimsmarkaðsverð á olíu. Þar með er líklegt að Íslendingar þyrftu að punga út fleiri krónum fyrir bensínlítrann. Í dag kostar hann minnst 250 krónur.