Hagnaður Eimskips 1,2 milljarðar - Eignir upp á 44 milljarða

Rekstrarhagnaður Eimskips (EBITDA) fyrstu sex mánuði ársins nam 19,0 milljónum evra, eða sem nemur um 2,9 milljörðum króna, samanborið við 17,9 milljónir evra fyrir sama tímabilið árið áður. Hagnaður eftir skatta fyrir fyrstu sex mánuði ársins nam 8,0 milljónum evra, eða um 1,2 milljarði króna. Þetta kemur fram í tilkynningu frá Eimskip, sem birt hefur verið á vef félagsins.

Heildarvelta Eimskips var 198,1 milljónir evra fyrstu sex mánuði ársins 2012, eða sem nemur um 29 milljörðum króna, samanborið við 186,5 milljónir evra á fyrri hluta ársins 2011. Að teknu tilliti til einskiptisliðar á árinu 2011 að fjárhæð 6,4 milljónir evra jókst veltan um 10,0% á milli ára.

„Athygli er vakin á því að á fyrri árshelmingi 2011, höfðu einskiptisliðir áhrif á bæði veltu og afkomu. Á því tímabili var krafa að fjárhæð 6,4 milljónir evra innheimt, en hún hafði áður verið að fullu færð niður í bókum félagsins. Auk þess hafði strand Goðafoss neikvæð einskiptisáhrif á afkomu sem nam 0,7 milljónum evra," segir í tilkynningunni.

Á árinu 2012 rekur félagið tvö skip á Ameríkuleið samanborið við eitt skip á árinu 2011. „Viðbótarskipið eykur flutningsmagn sitt jafnt og þétt en hefur ekki náð fullri nýtingu sem hefur áhrif á samanburð á rekstrarafkomu á milli ára."

Heildareignir félagsins í lok júní námu 299,8 milljónum evra, eða ríflega 44 milljörðum króna, vaxtaberandi skuldir námu 61,9 milljón evra og var eiginfjárhlutfallið 61,6%. Handbært fé nam 27,2 milljónum evra í lok júní 2012 og hafði lækkað um 16,3 milljónir evra frá árslokum 2011, einkum vegna fjárfestinga í skipum.