Skúli Mogensen tekur við sem forstjóri WOW air

Skúli Mogensen mun taka við sem forstjóri WOW air af Baldri Baldurssyni núverandi forstjóra. Þessi breyting gerist samhliða því að Títan, fjárfestingafélag Skúla, leggur inn 500 milljóna króna aukahlutafé til að efla rekstur fyrirtækisins.

WOW air hóf starfsemi í vor og hefur flogið til 13 áfangastaða í Evrópu í sumar. Félagið mun áfram fljúga til áfangastaða til Evrópu í vetur. „Ég vil nota tækifærið og þakka Baldri Baldurssyni fyrir gott samstarf og óska honum alls hins besta í framtíðinni. Jafnframt vil ég þakka ferðafélögum okkar kærlega fyrir móttökurnar svo og okkar frábæra starfsfólki og hlakka til að halda áfram að byggja upp öfluga ferðaþjónustu til og frá Íslandi" segir Skúli Mogensen í tilkynningu vegna breytinganna.