Hjón í öryrkjaíbúð í vikulöngu vatnsbaði

Guðberg Guðmundsson og Rósa Björnsdóttir þurftu í eina viku að búa við vatnsleka í íbúð Öryrkjabandalagsins í Mánatúni og kenna um seinagangi tryggingafélags. Vatn pípti niður úr lofti eldhússins sem var rafmagnslaust.

„Ísskápurinn er úti á gólfi og ég þarf að laga kaffi inni í þvottahúsi,“ segir Guðberg Guðmundsson, eldri borgari sem býr í íbúð Öryrkjabandalagsins á Mánagötu 2 og hefur frá því í síðustu viku glímt við stöðugan vatnsleka ofan úr eldhúsloftinu.

Guðberg segir lekann hafa uppgötvast eftir að rafmagn fór af íbúðinni aðfaranótt fimmtudags í síðustu viku. Vegna ótrúlegs seinagangs hjá tryggingafélagi hússins hélt einfaldlega áfram að leka í sex daga. Í gær fengu pípulagningamenn loks að komast að upptökum lekans á hæðinni fyrir ofan íbúð Guðbergs og Rósu Björnsdóttur konu hans.

„Þegar rafvirkinn opnaði ljósastæðið í eldhúsinu var kúpullinn fullur af vatni og hann fékk bara gusuna yfir sig,“ lýsir Guðberg sem allan tímann hefur safnað vatni í fötu vegna lekans úr rafmagnsdósinni. Hann kveðst ekki hafa þorað að fara frá í kvöldvinnu sína sem símasölumaður sem hann sinni til að drýgja ellilífeyrinn.

Ekkert rafmagn hefur verið í eldhúsinu fyrir utan á eldavélinni sjálfri og Guðberg kveðst áhyggjufullur yfir rafmagninu. „Allt sem heitir rafmagn á að hafa forgang,“ segir hann og bendir á að kona hans sé með lungnasjúkdóm og háð súrefni úr vél sem gangi fyrir rafmagni og þá sé ekki hálf sagan sögð:

„Rósa er líka með kæfisvefnsvél sem þarf rafmagn. Hún hefur lent í fjórum bílslysum, er spengd á baki og það er búið að skipta um báða hnjáliði. Svo fékk hún eldhúsinnréttingu á höfuðið og þá sködduðust í henni taugar.“

Húsið í Mánatúni 2 er aðeins tíu ára gamalt en Guðberg segir fjölmörg tilvik um galla hafa komið upp. Hann telur það hugsanlega skýra seinagang tryggingafélagsins sem sé einfaldlega orðið þreytt á vandamálum í húsinu. Síðdegis í gær hafði enn ekki náð að stöðva lekann með vissu og pípararnir horfnir á braut.

„Rósa er með vottorð um að hún þoli ekki ryk og ef það á að fara að standa hér í stórviðgerðum þá eigum við rétt á því að á meðan verði borgað undir okkur hótelherbergi með aðgangi að öllu,“ segir Guðberg en undirstrikar um leið að þrátt fyrir allt sé frábært að búa í Mánatúni. „Þetta er yndislegur staður í fallegu umhverfi. Við erum afar ánægð og viljum aldrei fara héðan út.“ gar@frettabladid.is