Halda upp á sumardaginn fyrsta

Venju samkvæmt verður blásið til hátíðarhalda víðsvegar um landið í dag í tilefni sumardagsins fyrsta. Hin árlega skátamessa í Hallgrímskirkju hófst klukkan ellefu en að henni lokinni verður boðið upp á kaffi og kleinur.

Víðast hvar verða skrúðgöngur farnar á höfuðborgarsvæðinu en dagskráin í dag verður fjölbreyttari en oft áður í Reykjavík þar sem Barnamenningarhátíðin fer nú fram. Meðal staða þar sem staðið verður fyrir skipulagðri dagskrá eru Fjölskyldu- og húsdýragarðurinn, Árbæjarsafn, Háskóli Íslands, Klambratún, Ráðhús Reykjavíkur og Nýlistasafnið en dagskrá dagsins má finna á vef Reykjavíkurborgar.