Stofna Menntunarsjóð fyrir tekjulágar konur

Mæðrastyrksnefnd Reykjavíkur hefur stofnað Menntunarsjóð til að styrkja tekjulágar konur til frekari menntunar svo að þær eigi betri möguleika á góðu framtíðarstarfi. Stofnfé og höfuðstóll sjóðsins er 5 milljónir króna og byggist á gjöf Elínar Storr til Mæðrastyrksnefndar Reykjavíkur.

Samkvæmt skipulagsskrá sjóðsins má verja vöxtum af höfuðstólnum, ásamt fé sem safnast í sjóðinn, til að styrkja konurnar. Auglýst verður eftir umsóknum í vor og fyrsta úthlutun verður fyrir nám sem hefst á haustönn 2012.

Menntunarsjóður Mæðrastyrksnefndar Reykjavíkur ætlar að efna til sérstaks átaks til að afla sjóðnum tekna með sölu Mæðrablóms. Gert er ráð fyrir að slíkt átak verði haldið árlega í tengslum við mæðradaginn; annan sunnudag í maí.