Lakara verð á útflutningsvörum Íslands

Seðlabankinn býst við að verð á helstu útflutningsafurðum Íslendinga verði lakara en útlit var fyrir í maí. Þetta kemur fram í Peningamálum bankans.

Álverð verður að líkindum töluvert lægra en gengið var út frá í maí og lækkar á þessu ári um 15% í stað 7,5% í maíspánni.

Auk þess hefur hægt á verðhækkunum helstu sjávarafurða og gert er ráð fyrir 2,5% hækkun í stað 3,5%.

Bankinn gerir hins vegar ráð fyrir að útflutningur vöru og þjónustu muni aukast um 5,4% á þessu ári í stað 3,8% í síðustu spá. Mestu munar þar um meiri útflutning sjávarafurða en sömuleiðis gert ráð fyrir meiri útflutningi álafurða og ýmissa annarra iðnaðarvara. Vegna kröftugri útflutningsvaxtar á þessu ári verður vöxturinn minni sem því nemur á næsta ári.