Vaxtagreiðsluþakið er valkvæð þjónusta

Íslandsbanki hafnar alfarið athugasemdum Hagsmunasamtaka heimilanna um að markaðssetning á vaxtagreiðsluþakinu gefi ranga mynd af þjónustunni. Þjónustunni er aðeins ætlað að veita viðskiptavinum skjól fyrir sveiflum í greiðslubyrði við hækkun vaxta.

Tekið er fram að þjónustan sé valkvæð. Viðskiptavinir verða að óska sérstaklega eftir þjónustunni og því eru engin óverðtryggð lán bankans sjálfkrafa með vaxtagreiðsluþak.

Þjónustan minnkar áhættu viðskiptavina af sveiflum í vaxtagreiðslum sem miðast við vexti Seðlabanka Íslands. Ef vextirnir verða hærri en vaxtagreiðsluþakið sem valið er leggjast umfram vextirnir við höfuðstól lánsins og dreifast yfir lengra tímabil. Þannig hækkar afborgun viðskiptavinarins af höfuðstólnum framvegis, en aðeins um lítið brot í senn miðað við vaxtagreiðsluna.

„Íslandsbanki telur að með tilkomu vaxtagreiðsluþaksins eigi viðskiptavinir bankans nú raunverulegt val milli verðtryggðra og óverðtryggða vaxta þar sem óvissa um framtíðar greiðslubyrði hefur verið takmörkuð," segir í fréttatilkynningu.