FME endurskoðar reglur um hæfismat stjórnenda

Fjármálaeftirlitið (FME) hefur, í kjölfar nýfallins úrskurðar Persónuverndar, hafið endurskoðun á reglum eftirlitsins um framkvæmd hæfismats framkvæmdastjóra og stjórnarmanna fjármálafyrirtækja. Einnig verður endurskoðað það eyðublað sem Fjármálaeftirlitið notast við til að afla upplýsinga í tengslum við mat á fjárhagslegu sjálfstæði viðkomandi aðila. Vonast er til að þeirri vinnu ljúki á næstu vikum.

Þetta kemur fram á vefsíðu eftirlitsins. Eins og fram hefur komið í fréttum gerði Persónuvernd nýlega athugasemdir við hæfismatið hjá Fjármálaeftirlitinu og taldi það brjóta í bága við lög um persónuvernd.

Á vefsíðunni segir að þegar Fjármálaeftirlitið metur hæfi framkvæmdastjóra og stjórnarmanna fjármálafyrirtækja skal það meðal annars leggja mat á fjárhagslegt sjálfstæði þeirra. Var þessu hæfisskilyrði bætt við með lögum... sem breyttu lögum um fjármálafyrirtæki og með lögum... um vátryggingastarfsemi.

Persónuvernd tók upplýsingaöflun Fjármálaeftirlitsins í þessu sambandi til skoðunar. Mat Persónuverndar var að Fjármálaeftirlitinu væri heimilt að fá og varðveita þær persónuupplýsingar um stjórnarmenn og framkvæmdastjóra sem því væru nauðsynlegar til að leggja mat á fjárhagslegt sjálfstæði viðkomandi. Fjármálaeftirlitið hefði því svigrúm um það hve langt væri gengið við slíka upplýsingaöflun og hversu víðtæk slík athugun þyrfti að vera, en hún yrði að fara að grunnkröfum laga um persónuvernd og meðferð persónuupplýsinga.

„Fjármálaeftirlitinu bæri því að gæta hófs í upplýsingasöfnun sinni, afla ekki ónauðsynlegra upplýsinga og aðeins þeirra sem gætu haft áhrif á niðurstöðu mats á fjárhagslegu sjálfstæði. Þá skyldi gæta sjónarmiða um sanngirni og vandaða vinnsluhætti en til þess þarf m.a. að tryggja gagnsæi svo menn viti fyrirfram áður en þeir taki við starfi hvaða upplýsingum Fjármálaeftirlitið muni kalla eftir," segir á vefsíðunni.

Niðurstaða Persónuverndar var sú að til þess að vinnsla upplýsinga í tengslum við mat á fjárhagslegu sjálfstæði samrýmdist þessum grunnreglum... laga um persónuvernd og meðferð persónuupplýsinga þyrfti Fjármálaeftirlitið að afmarka með mun skýrari hætti en nú er gert hvaða persónuupplýsingar væru nauðsynlegar vegna mats á fjárhagslegu sjálfstæði framkvæmdastjóra og stjórnarmanna fjármálafyrirtækja.

Leggur Persónuvernd til að reglur Fjármálaeftirlitsins verði endurskoðaðar með hliðsjón af framangreindu. Þessi endurskoðun er nú hafin eins og frá er greint hér að framan, að því er segir á vefsíðu FME.